Stopgap, Tofil mitikang sa Buildrite Cup semis
CEBU, Philippines — Ang Stopgap Sealants ug ang Tofil Finishing mipalagpot sa tagsa-tagsa nila ka mga karibal aron pag-abante sa semifinal round sa Architects+Engineers Basketball Buildrite Cup didto sa Cebu Port Authority (CPA) Gym.
Ang Stopgap nagsandig sa balanseng ataki aron tagakon ang Sapal Sealant and Waterproofer, 66-43.
Si Dexy Suico maoy nangu sa Stopgap uban ang 13 puntos, pito ka rebounds, duha ka assists, ug usa ka steal.
Sila si Lawrence Gayotin ug Nikko Punay parehong mi-iskor og nuybe puntos, samtang sila si Richie Bactol, Gerald Jayme, ug James Bolos nagkumbinar og 21 puntos aron ituboy ang Stopgap ngadto sa Final Four.
Sa laing resulta, si Kim Rojas mipupo og 19 puntos, lima ka rebounds, lima ka steals, ug duha ka assists sa dihang gipabakasyon sa Tofil ang Floortek, 69-59.
Si Arnel Cordero mikadlit og 16 puntos, siyam ka rebounds, ug tulo ka assists, si Neil Tiempo midugang og 12 puntos, tulo ka rebounds, ug upat ka assists samtang si Christopher Gayotin mitampo og 10 puntos, lima ka rebounds ug pito ka assists alang sa Tofil.
- Latest
