UV Lancers, Baby Jaguars luna sa finals ang tirade
CEBU, Philippines — Ang way pildeng defending champion nga University of the Visayas (UV) Green Lancers ug ang University of San Jose-Recoletos (USJ-R) Baby Jaguars nagtinguha nga mobira og luna sa kampiyonato sa ilang pakigsangka batok sa managlahing kontra pagsugod sa semifinal round sa Cebu Schools Athletic Foundation, Inc. (CESAFI) Season 23 Men's Basketball Tournament karong adlawa didto sa Cebu Coliseum.
Makigharong ang top seed nga Lancers batok sa fourth-ranked University of San Carlos (USC) Warriors sa main game sa alas 6:45 sa gabii, samtang ang Baby Jaguars, nga maoy No.1 qualifier sa juniors division, makigpinaksitay sa UV Baby Lancers sa pasiunang duwa nga gikatakda sa alas 5:15 sa hapon.
Ang Lancers ug ang Baby Jaguars nanginahanglan nga modispatsa sa ilang mga kontra kausa lamang aron sila mo-abante sa finals.
Naka-angkon sila og twice-to-beat advantage human gidominar ang eliminasyon diin ang Lancers mikumpleto og dalaygong 10-0 sweep, samtang ang ang Baby Jaguars milugwa nga No.l qualifier sa juniors division sa labing unang higayon sud sa 23 ka tuig nga kasaysayan sa liga bitbit ang 9-1 win-loss record.
Sa laing bahin, ang USC Warriors nakatikang sa Final Four uban ang 6-4 nga baraha human ang USJ-R natagak sa ikaunom nga puwesto sa dihang ang tulo ka daog sa Jaguars na-forfeit tungod sa diskwalipikasyon sa kontrobersiyal nilang player nga si Evan Jose "EJ" Agbong.
Samtang ang Baby Lancers ug ang University of Cebu (UC) Baby Webmasters parehong nagkupot og 7-3 nga marka apan ang UV maoy milukat sa ikaupat ug katapusang ticket sa semis gumikan sa winner-over-the-other rule.
- Latest
