Duggies 2.0 naghari sa UP-Cebu Alumni caging

CEBU, Philippines —  Ang Duggies 2.0 mipakaging sa Dosmil, 87-73, aron langkaton ang kampiyonato sa University of the Philippines (UP)-Cebu Alumni Basketball League Season 2 ning bag-ohay pa lamang didto sa Sacred Heart Center Sports Club.

Nagtabla ang duha ka kampo, 17-17, sa sayong bahin sa duwa apan ang Duggies nakamaneho pagposte og tres puntos nga bentaha, 40-37, sa halftime.

Misamot pa ang kainit sa Duggies sa ikatulong kuwarter diin ilang gilabhan ang Dosmil, 21-10, aron paburoton ang ilang labaw ngadto sa 61-46 padung sa pinal nga 10 minutos sa aksiyon.

Wala na molingi pa sukad niadto ang Duggies dayon na ngadto sa pagkab-ot og 14 puntos nga demolisyon sa Dosmil. Si Chyle del Rosario misidlak nga labing hayag sa Duggies uban ang 25 puntos, siyam ka rebounds, ug lima ka assists hinungdan sa pagbayaw kaniyang Finals MVP.

Samtang si Raymund Montajes mihipos og 19 puntos sa pilderong Dosmil.