‘Big men’ gikuha’g balik sa Magic

Duna karoy posibilidad nga mapagamyan ang playing time ni Kai Sotto sa pagduwa niini sa Orlando Magic sa umaabot nga NBA Summer League sugod karong Hulyo 7,2023 didto sa Las Vegas tungod gikuha’g balik sa Magic ang duha nila ka “big men.”

Gikuha sa Orlando silang Goga Bitadze ug Mo Wagner nga parehong mas guwang ug beterano itandi kang Sotto nga nag-edad pa lang karon og 21-anyos.

Niadtong adlaw nga Sabado nidesisyon ang Orlando na kuhaon pagbalik si Mo Wagner nga dunay $16 milyones deal kanila sud sa duha ka tuig, matud pa ni Adrian Wojnarowski na gikan sa ESPN.

Ang 6’11 nga si Wagner beterano nga big man sa ilang koponan gikan sa Germany. Siya ang maguwang ni Franz Wagner usa sab ka rising star sa Magic. Si Wagner nasulod sa NBA pinaagi sa Los Angeles Lakers isip 25th overall pick sa NBA Draft niadtong 2018.

Samtang si Bitadze, ang ika-18th  nga overall pick sa niaging tuig 2019. Gikataho nga silang Wagner ug Bitadze maoy mo backup sa starting center sa Orlando nga si Wendell Carter, Jr.

Ang praktis karong adlawa mao pay labing una para kang Kai kauban ang team sa Magic, diin kinahanglang sa praktis palang mopakita na kini sa iyang abilidad.b Dili ikalimod nga mas bata si Sotto itandi aning duha, sanglit duna say ikabuga ang batan-ong Pinoy tungod sa kataas sa iyang kasinatian batok sa mga dagkong teams ug kaatbang sa NBL (National Basketball League) sa Australia diin nag average siya og 6.8 points, 0.4 assist  ug 4.5 rebounds kada duwa.

Ipuno pa ang iyang nakat-onan sa Japanese B League dili palang dugay ug ang iyang mga katuigan gikan sa Gilas Pilipinas sukad sa iyang high school. Ang agent ni Sotto daan ng miingon nga kinahanglang mahatagan kini og taas ang playing time aron mapabuhagay tanan niyang abilidad aron makaagni og NBA teams.

Sa pagkakaron, usa lang ang shooting guard sa Magic nga si Kevon Harris sa two-way deal, tungod niini mahimo nilang kuhaon si Sotto tungod kay duna pay duha ka slots ang koponan alang sa regular season kana kung makauyon sila sa abilidad ni Sotto sa Summer league.

Si Sotto ug ang Magic Summer League squad motapon padung sa Las Vegas alang sa ilang sangka batok Detroit Pistons karung Hulyo 8 nga himuon sa makasaysayanong Thomas and Mack Center sa  University of Nevada campus.  Ang  Magic makigsangka og lima ka teams sa Summer League. Ini og human niini, bisan unsang NBA teams mahimo nang mokuha sa serbisyo ni Kai, kana kun maayo iyang performance sa maong liga. — CNU Intern /IBM