Joher 5-0 na sa Hoops Arlon Cup Season 2

CEBU, Philippines — Gipatikalbong sa Joher Transport and Logistics ang Sudina Skunk, 80-69, aron pagpabiling way pilde sa Hoops Nation Arlon Cup Season 2 didto sa City Sports Club-Cebu gym.

Si Mikoh Pahugot mipupo og 19 puntos, unom ka rebounds ug duha ka steals sa dihang giinat sa Joher ang mainit nilang ratsada ngadto sa lima ka duwa.

Sa laing bahin, ang JVK mibugha sa Trojan Warriors, 89-76, samtang ang Dracones mipaksit sa Zaruchi pinaagi sab sa 89-76 nga desisyon.

Si Ryan Lim mirapido og 24 puntos uban ang lima ka rebounds ug duha ka steals alang sa JVK nga nagkupot na karon og 5-1 nga baraha samtang si Kline Ochavo mipatuasik og 28 puntos, unom ka rebounds ug tulo ka assists aron tabangan ang Dracones pagkadlit sa ikaupat nilang daog sud sa lima ka duwa.

Mikuha sab og atensiyon si Jhomer Ranceli uban ang 21 puntos, unom ka rebounds ug tulo ka assists sa dihang gipatikangkang sa MV Models ang MEQ Builders, 61-51, aron inaton ang ilang marka ngadto sa 3-2.

Wala sab magpabitin ang Cupin Compound ug Orchid City nga mipaksit sa ilang mga karibal aron tablahon ang ilang records ngadto sa 3-3.

Si Nino Belande mikimada og 24 puntos, 11 ka rebounds, ug lima ka assists sa dihang gilamba sa Cupin Compound ang Tried Door, 78-69, samtang si John Geraldizo mibomba og 26 puntos, unom ka rebounds ug usa ka steal sa dihang gipaluhod sa Orchid City ang Koruna Assist, 78-72.

Sa ubang mga resulta, si Rudolf Patron miposte og 19 puntos ug duha ka steals sa dihang ang DV Shop (2-3) nakaipsot sa Parokya Ni Edgar, 81-79, samtang si Jake Caballero miwadwad og 25 puntos, walo ka rebounds ug tulo ka assists aron pangulohan ang S.I.V (2-3) ngadto sa 79-39 nga pagkamsaker sa Venoms.