Doncic giagak ang Mavs uban ang triple-double

CEBU, Philippines — Si Luka Doncic mipabuto og 41 puntos sa iyang triple-doube aron agakon ang Dallas Mavericks ngadto sa 116-113 nga pagpayaka sa defending champion Golden State Warriors sa NBA kagahapon didto sa American Airline Arena sa Dallas, Texas.

Ang Slovenian superstar sa Mavs milangkat sab og 12 ka rebounds ug mipasa og 12 ka assists sa ika-51 nga triple-double sa iyang karera.

Giwani ni Doncic ang alas sa Warriors nga si Stephen Curry, nga mihipos lamang og 32 puntos.

Si Doncic nakakuha og igong suporta gikan nilang Tim Hardaway ug Spencer Dinwiddie nga nagkumboya'g 36 puntos alangsa Mavs.

Didto sa Detroit, si Julius Randle malipayong nagselebrar sa ika-38 niyang birthday human siya mipabuhagay og season-high 36 puntos aron pangulohan ang New York Knicks ngadto sa 140-110 nga demolisyon sa Pistons.

Sa Portland, ang Los Angeles Clippers mipakaging sa Trail Blazers, 118-112, ubos sa pagpangu ni Norman Powell nga mikadlit og 32 puntos. Mihimo sab og kasikas si Reggie Jackson nga mipupo og 24 puntos.