Cebu City-ANS cagebelles andam mosagubang sa hagit

CEBU, Philippines — Ang Cebu City-Abellana National School (ANS) women's basketball team nasayud sa mabug-at nga tahas nga ilang pas-anon apan andam sila nga sagubangon ang dakong hagit nga nag-atang kanila sa unahan.

Mao kini ang gipasalig sa ANS-Cebu City cagebelles sa ilang pagrepresenta sa Central Visayas sa women's division sa labing unang Batang Pilipino Basketball League (BPBL) National Finals nga gikatakda sa Enero 26-29 sunod tuig didto sa kaulohan.

Ang pakigsangka batok sa labing tang-an nga mga babayeng Under 18 players lukop nasud sa giatngan nga grand finals nga nagdalit og P300,000 nga ganti sa makampiyon usa ka malisud nga misyon.

Apan si ANS coach Darwin Dinoy masaligon kaayo sa ilang tsansa. Nagtoo siya nga ang hugtanon nilang pagbansay-bansay ug intensibong training makahatag kanila og dakong abor sa labing dako nga torneyo nga ilang pagasalmotan.

"Representing Cebu City is a big honor for us," matud pa ni Dinoy. "Many of my players are first timers in a national tournament but our preparation will play a key role in our bid to win the title."

Sa ilang laraw nga birahon ang korona, si Dinoy magsandig sa duha ka sinaligan niyang mga beterano nga sila si Daniella Alterado ug Maxim Magbanua, nga nakapakita na og aksiyon sa SBP 3x3 National Finals ug nakarepresenta sa Cebu City sa Batang Pinoy National Championships sa maigi.

Nagkumpleto sa Cebu City-ANS lineup mao sila si Christine Agbay, Alaiza Maureen Evangelio, Jessha Banquil, Danice Ycot, Althea Degamo, Arwien Aventurado, Maria Nadine Labay, Jesrica Tenebro, Keanna Shandy Estomago, Lourien Navarro, Jasmine Reyes, Zaydhen Rosano, ug Winona Tabada. 

Sa laing bahin, si BPBL commissioner Ron Camara naglantaw sa unahan sa usa ka kulbahinam ug makalingaw nga grand finals duha ka bulan gikan karon.

"This is the first time that we will have a national basketball tournament featuring the best region-based teams.

Everyone can watch and enjoy the games since we will have a free entrance. Expect an all out performance by the teams, ibibigay talaga ng mga players yung best nila kasi they will get scouted and they will get a chance to land a scholarship with the biggest universities and colleges in Manila," dason pa ni Camara.