Bulls gipabugnaw ang Celtics

CEBU, Philippines — Si DeMar DeRozan mipabuhagay og 28 puntos samtang si Zach LaVine midugang og 22 puntos sa dihang giputol sa Chicago Bulls ang siyam ka sagunson nga daog sa Boston Celtics, 121-107, sa NBA kagahapon didto sa United Center sa Chicago, Illinois.

Wala sab magpaalkansi si Nikola Vucevic nga midugang og 12 puntos ug 13 ka rebounds alang sa Bulls nga nakadaog sa ikaduhang higayon sa miagi nilang tulo nila ka panag-abot sa Celtics.

Bisan og napilde, ang Celtics mao gihpon ang nagkupotsa labing nindot nga 13-4 record ning NBA season.

Nalubong sila og 21 puntos sa ikatulong kuwarter ug igo lamang nakasikit ngadto sa 10 puntos sa pinal nga 4:49 sa aksiyon.

Si Jayson Tatum maoy nangu sa pilderong Celtics uban ang 28 puntos, 11 ka rebounds ug pito ka assists.

Didto sa New Orleans, gikastigo sa Pelicans ang Golden State Warriors, 128-83.

Hinoon ang Warriors miduwa nga wala ang upat nila ka mga bitoon nga sila si Stephen Curry, Draymond Green, Klay Thompson ug Andrew Wiggins.

Si Brandon Ingram maoy bida sa Pelicans human mipaulbo og 35 puntos samtang sila si CJ McCollum ug Jonas Valanciunas nagkumboya'g 25 puntos.

Didto sa Milwaukee, si Giannis Antetokounmpo miratsada og 37 puntos aron pangulohan ang Bucks ngadto sa 119-111 nga pagpakaging sa Portland Trail Blazers.

Sa laing resulta, sila si Donovan Mitchell ug Darius Garland nagkumbinar og 55 puntos sa dihang gipasukarap sa Cleveland Cavaliers ang Atlanta Hawks, 114-102.