Refresher course sa mga CESAFI referee sugdan karon

CEBU, Philippines — Mosikad na ang duha ka adlaw nga Refresher Course sa mga basketball referee sa Cebu Schools Athletic Foundation, Inc. (CESAFI) karong adlawa diha sa Cebu Coliseum. Sugdan ang rehistrasyon sa alas-8 sa buntag.

Gipasiugdahan kini ni CESAFI commissioner Felix "Boy" O. Tiukinhoy, Jr. agi'g pangandam sa giatngan nga comeback season sa liga nga gikatakdang mo-arangkada karong Oktubre 15.

Mopahigayon sa seminar mao ang kanhi PBA referee nga si  Romy Guevarra kauban si CESAFI deputy commissioner Danny Duran nga maoy motan-aw kon angayan na ba ang usa ka reperi nga modagan sa mga dagkong liga.

Moabag kanila sila si CESAFI head referee Edwin Dejacto ug senior referee Ed Aguelo nga parehong mga sakop sa CESAFI technical committee.

"Nalipay mi nga nabalik na ang kinadak-an nga liga sa Visayas nga mao ang CESAFI gikan sa duha ka tuig kapin nga pagka-undang tungod sa pandemic," matud pa ni Dejacto. "Among paningkamotan nga mapun-an ang among nakat-onan gumikan sa maong seminar. Akong giawhag ang tanang miyembro sa MCBRA sa pag-attend niini."