Pedal Kings XC Tour sa Liloan sunod bulan

CEBU, Philippines — Kasado na ang tanan alang sa Pedal Kings XC Tour nga gikatakda karong Oktubre 23 didto sa Jubay, Liloan amihanang bahin sa Sugbo.

Giorganisa sa Team Cobo inabagan sa Liloan LGU, ang XC race ug fun ride nga gipaluyohan sa RD Pawnshop, CSAS, Haier, Smart, EZ Graphics, Move, Frasco Water, Nature’s Spring, ug Pocari Sweat naglaraw nga palamboon ang sports ug eco tourism industry sa Liloan.

Ang mga kategoriya nga kumbatihan mao ang 17 under, 18-28, 29-39, 40-above, ug women's.

Ang nag-unang tulo ka mananaog sa tanang dibisyon makadawat og parehong ganti nga P5,000, P2,000, ug P1,000.

Ang rehistrasyon sa XC race nagkantidad og P685 apil na niini ang cycling jersey, packed lunch, drawstring bag, face towels., ug mineral water.   

Samtang P385 ang bayad sa run ride apil na niini ang finisher's shirt, snacks, drawstring bag, mineral water. ug face towels.

Alang sa dugang detalye, mahimong mokontak ni MJ sa 423-7782 o bisitaha ang Pedal Kings Facebook page.