CEBU, Philippines — Ang Sugbuanong sportsman nga si Jerry Maratas usa na karon ka sertipikadong 'double eagle'.
Kini human ang tinamod nga multi-sport enthusiast naka-iskor og 'eagle' sa par-5, 18th hole sa Alta Vista Golf and Country Club didto sa Barangay Pardo, Cebu City atol sa Talaga Invitational Cup Shepherds’ Mini Tournament kagahapon sa buntag.
Ang mga nakasaksi sa talagsaong nakab-ot ni Maratas mao sila si Randy Suzara, Leo Ranido, ug Fr. Mon Ofredo. Naabot kini upat ka bulan human siya milugwa nga kampiyon sa The View Invitational 2022 sa Alta Vista niadtong Mayo.
Sa kalibutan sa golf, sulagma kaayo ang usa ka eagle gumikan kay bisan gani ang propesyonal nga mga golfers maglisud pag-iskor niini. Mao nang si Maratas, nga usa ka dekalibreng engineer ug kontraktor, daw sa naglutaw sa panganod sa himaya human kini niya makab-ot.
"I’m so happy to finally achieve this “eagle’ after a number of opportunities in my five years of playing this sport. It’s certainly the dream of most golfers to achieve this rare feat," matud pa ni Maratas.
"I hope to get a more prestigious hole-in-one in the near future," dugang pa sa labing dugay nga presidente sa Cebu Executives and Professionals Chess Association (CEPCA).
Usa ka opisyal sa Cebu Central Eagles Club (CCEC) ubos sa The Fraternal Order of Eagles (Philippine Eagles), si Maratas taas gyud og lupad sama sa usa ka agila, sa sports ug sa kinabuhi.