Beermen kampiyon na sab Fajardo gibayaw nga finals MVP
CEBU, Philippines — Uban ang record nga unom ka MVP awards, si June Mar Fajardo misemento na sa iyang pangan isip usa sa labing ngilngig nga PBA players sa kasaysayan.
Apan ang Sugbuanong basketball star daw sa wala pa mahuman gikan niini.
Padayon siyang nangharos og dungog aron pasinawon pa og maayo ang naggilak-gilak nang daan niyang karera.
Duha ka gabii pa lamang ang milabay, ang garbo sa Pinamungajan maoy gibayaw nga Finals MVP sa dihang gilampaso sa San Miguel Beermen ang undermanned nga TNT Tropang Giga, 119-97, sa tinagakay nilang Game 7 aron paglugwa nga kampiyon sa PBA Philippine Cup didto sa Smart Araneta Coliseum.
Si Fajardo, nga sa sayo pa gipasidunggang Best Player of the Conference, miposte og dalaygong double-double uban ang 19 puntos ug 18 ka rebounds nga iyang gipalamanan og lima ka assists sa dihang gibulsa sa Beerman ang ika-10 nilang korona sa All-Filipino Cup ug ika-28 sa kinatibuk-an aron pahugtan ang ilang dungog isip labing daogan nga team sa PBA.
Sa tibuok serye, ang 32-anyos nga si Fajardo mi-average og 19.0 puntos, 16.6 rebounds, 2.7 assists ug 1.1 blocks matag duwa aron pagsakmit sa Finals MVP award.
Ang produkto sa University of Cebu (UC) nakakuha og igong suporta gikan nilang CJ Perez, Marcio Lassiter, Chris Ross, ug Vic Manuel sa ilang pagsakmit sa titulo.
Alkansi og singko puntos, 84-89, human sa tulo ka kuwarter, ang gibansagan nga "Death Five" sa Beermen nagtambayayong paglusad og eksplosibong 17-0 nga sinugdanan sa pinal nga 12 minutos sa aksiyon nga nahimo nilang taytayan ngadto sa pagdimdim sa katam-is sa kampiyonato.
Giposasan sa Beermen ang Tropang Giga ngadto lamang sa otso puntos sa katapusang kuwarter samtang sila mikadlit og 35 nga miresulta ngadto sa 22 puntos nga demolisyon.
Si Perez maoy nangu sa Beermen bitbit ang 25 puntos samtang si Manuel mi-iskor og 16 sa dihang silang duha nakatilaw og PBA title sa labing unang higayon. Si Lassiter ug Ross mikimada og 15 ug 12 puntos samtang sila si Moala Tautuaa ug Simon Enciso nagkumboya og 25 puntos timaan sa balanse nilang ataki nga nakabugha sa Tropang Giga.
- Latest
