CEBU, Philippines — Duna na gyu'y usa ka Sugboanon nga nanghawod sa senemanang online tournaments sa Cebu Executives and Professionals Chess Association (CEPCA).
Si National Master Merben Roque maoy mikab-ot sa maong dungog human iyang gidominar ang Cepcan Alex Chua Super Blitz 4 niadtong weekend.
Ang kanhi national youth champion nga si Roque mitali og 11.0 puntos aron sakmiton ang titulo sa torneyo nga gipaluyohan ni US-based Cepcan Engr. Alex Chua, usa ka nursing administrator sa Fidelity Health Care Nursing Home didto Los Angeles, California.
Nagsolo sa ikaduhang dapit si John Morazo uban ang 10.5 puntos.
Sila si Grandmaster Joey Antonio ug NM Rommel Ganzon parehong dunay 9.5 puntos, apan si Antonio maoy mipahiluna sa ikatulong puwesto gumikan sa may taas niyang tie-breaker.
Si NM Rogelio Enriquez Jr. mihipos og 9.0 puntos aron pagpatong sa ikalimang dapit samtang si Rowel Roque sa Valenzuela City maoy mikumpleto sa top 6 bitbit ang 8.5 puntos.