Manila players nangharos sa Jojo Dondon super Blitz 5
CEBU, Philippines — Giharos sa taga-Manila nga sila si John Ranel Morazo, Sherwin Tiu ug Jerome Villanueva ang nag-unang tulo ka puwesto sa Jojo Dondon Super Blitz 5 nga gipasiugdahan sa Cebu Executives and Professionals Chess Association (CEPCA) niadtong weekend.
Si Morazo, kanhi pambato sa Far Eastern University (FEU) ug si Tiu nga kasamtanang miyembro sa Philippine Christian University (PCU) varsity team, parehong mitapos uban ang 12.0 puntos, apan si Morazo maoy miangkon sa unang dapit tungod sa mas taas niining tie-breaker. Si Villanueva sa Adamson University mitali og 11.5 puntos aron pagsolo niini sa ikatulong puwesto ning torneyo nga gipaluyohan ni US-based Cepcan ug US candidate master Engr. Josito "Jojo" Clamor Dondon sa Allen, Texas. Sila si National Master Merben Roque ug International Master Barlo Nadera parehong mikadlit og 10.5 puntos aron pagpahimutang sa ikaupat ug ikalima nga dapit, samtang si Antonio Cabibil maoy mipatong sa ikaunom bitbit ang 10.0 puntos.
Lain pang nanghawod sa senemanang aksiyon sa CEPCA mao sila si Jonard Labadan sa Architect Fil Kapuno III Blitz, Antonio Cabibil sa CEPCA Blitz ug Rey Flores sa Prexy Jerry Maratas Arena.
- Latest