Cebuano karateka m ibihag sa world no. 1
Cebu, Philippines — Human sa tulo ka pagsuway, nabihag na gyud sa Sugboanong karateka nga si Orencio James 'OJ' de los Santos si world No. 1 Eduardo Garcia sa Portugal.
Ning higayona, wala na'y mga kakulian si De los Santos nga kasamtangang No. 2 sa e-kata world rankings, nagpadayon sa init niyang pag-asdang sa labing taas nga puwesto human iyang gibuntog si Garcia aron langkaton ang bulawang medalya sa individual male seniors event sa Athlete's E-Tournament nga giorganisar Russia.
Ang 30-anyos nga si De los Santos, kinsa nagrepresentar sa Philippines ubos sa International Shotokan Karate Federation, mipilde ni Garcia sa labing nipis nga labaw, 25.0-24.9.
Dalaygon kaayong namawi si De los Santos nga maoy gideklarar nga mananaog batok ni Garcia atol sa ikaduha nilang panag-abot sa finals sa Adidas Karate World Open Series #2 niadtong Hulyo 13, apan gibawi ra sab dayon kaniya ang titulo gumikan sa scoring error.
Naparot sab si De los Santos batok ni Garcia sa sikit sab kaayong desisyon, 24.5-24.2 sa una nilang sangka sa kampiyonato sa SportData E-Tournament World Series duha ka bulan ang milabay.
Miangkon si De los Santos nga ang kontrobersiyal nga resulta sa miagi nilang engkuwentro ni Garcia nakadugang sa iyang motibasyon nga manimawos ning higayona.
"Because of that controversial scoring in our second final meeting at the Adidas World Open, that’s what motivated me to train a lot harder when the third meeting comes around," matud pa two-time Southeast Asian (SEA) Games bronze medalist.
"This victory means a lot. This will motivate me to train harder for the upcoming virtual tournaments," dugang pa ni De los Santos nga nakatigum na karon og upat ka golds, usa ka silver ug usa ka bronze sa 13 ka mga torneyo nga iyang gisalmotan sa miaging upat ka bulan.
- Latest
