Rockets mipaksit sa Lakers; Lebron wala miduwa

CEBU, Philippines — Mikamada og 39 puntos si James Harden sa dihang  ang Houston Rockets mipaksit ang Los Angeles Lakers nga miduwa nga wala si LeBron James sa NBA kagahapon didto sa Orlando, Florida.

Gawas sa iyang puntos, si Harden mihimo sab og 12 ka assists aron mahimong best player of the game.

Gihuman sa Rockets ang duwa sa iskor nga 113-97. Ila kining nakab-ot bisan og wala makapakita'g aksiyon ang star player nilang si Russell Westbrook kay dunay bun-og sa iyang paa.

Wala sab hinuon makataak sa korte ang alas sa Lakers nga si James gumikan kay duna sa'y dili maayong gipamati sa iyang lawas.

Mao kadto ang ikaduhang sagunson nga pilde sa Lakers sukad ilang gilangkat ang No.1 seed sa Western Conference.

Ang Lakers maoy mitali sa nag-unang 10 puntos sa katapusang kuwarter, apan igo lamang silang nakasikit ngadto sa 89-94 sa nahibiling otso minutos sa duwa.

Kini gumikan kay ang Rockets mitubag pinaagi sa  11-0 rally aron pasulbungon og balik ang ilang labaw ngadto sa 16 puntos sa iskor nga 105-89, sa katapusang singko minutos sa aksiyon.  Sa maong ratsada, sila si Harden, Austin Rivers ug Robert Covington miposa og  tagsa ka tres.

Si Kyle Kuzma dunay 21 puntos, samtang si Anthony Davis miamot og 17 puntos ug 12 ka rebounds, apan wala kini makasalbar sa Lakers.