Niño gen. merchandising midaog na gyud sa 1st DBL Caging

CEBU, Philippines — Sa ikatulo nga pagsuway, naangkon na gyud sa Niño General Merchandising ang labing una nilang daog sa 1st Dayon Basketball League (DBL) Invitational Tournament.

Dili basta-basta ang kadaogan sa Niño General Merchandising kay ilang gipahamtangang og makauuwaw nga kapildihan ang Vipers, 113-22 niadtong Sabado diha sa Sambag 1 Sports Complex, Dakbayan sa Sugbo.

Ang 91 puntos nga daog maoy labing dako nga natala sa kasamtangang liga. Mas dako pa ang lubong kay sa 22 puntos nga nakuha sa Vipers.

Si Andrew Pelonio maoy nangu sa balanseng opensa sa Niño General Merchandising pinaagi sa iyang 26 puntos.

Lain pang lima ang miiskor og double figures  alang sa Niño General Merchandising nga hayag pa sa udtong tutok ang sayo nilang paglawig human miabante  og  30-6 sa first quarter pa lang.

Miburot pa ang labaw ngadto sa 58-13 sa halftime nga nakapaluya sa nagkagidlay nga Vipers.

Ang Niño General Merchandising ug Vipers pareho karong nagbitbit og 1-2 nga baraha sa bracket B standing ning maong liga nga giorganisar ni Sambag 1 barangay councilor Allan Glen Abella.

Sa laing duwa sa bracket B, ang Shumava Residence mirehistro sa ikaduha nilang daog dihang ilang gitumba ang Bobcats, 75- 68.

Gipangulohan ni Hanzel Camacho ang Shumava Residence nga miugkat og 19 puntos.

Ang Shumava Residence aduna na'y 2-1 win-loss record, samtang ang Bobcats nagtangag og 1-2 nga baraha.

Sa bugtong duwa sa bracket A, temporaryo karong nagsolo sa ikaduhang dapit ang AMCOD Thur Blazer human sa ilang kadaogan  batok  sa ELJ-77  sa  iskor  nga 82-74.

Tanang lima ka AMCOD players nga nakaiskor ang mirehistro og double figures pinangulohang ni Joel Bensing nga

mikadlit og 26 puntos, gisundan ni Pablo Cabrera sa iyang 17 puntos, Toroy Hoybia nga adunay 15 puntos. Sila si Ayan Cabanero ug Lina Baguio mitampo'g 14 ug 10 puntos.

Ang liga nga gipaluyohan sa Dayon Enterprises and Printing Press, AJ Sportswear, Atisor Cakes Art & Design, Sisig Tiriake ug Cebu's Tasty, gipadagan ni Edwin Dejacto sa CEBRA.

PUNTOS MATAG USA

Unang duwa:

AMCOD (82) – Bensing 26, Cabrera 17, Hoybia 15, Cabanero 14, Baguio 10.

ELJ-77 (74) – Guarisma 16, Canoneo 11, Tenebroso 11, Rancili 9, Pantaleon 6, Labajo 6, Casada 6, Laroa 5, Inso 4.

Ikaduhang duwa:

NIÑO (113) – Pelonio 26, Raganas 14, Sanopao 13, Solivio 12, Bauri 10, Arrogante 10, Macoy 6, Navarro 6, Carillas 6, Roquiniza

6, Onlaga 4.

VIPERS (22) – Rivera 6, Pama 4, Opone 4, Sotto 3, Oyanguren 2, Emnace 2, Almagro 2.

Ikatulong duwa:

SHUMAVA (75) – Camacho 19, Enriquez 14, Duenas 11, Tundag 8, Muralla 7, Espina 7, Intes 6, Goromba 3.

BOBCATS (68) – Tagaloguin 24, Cabahug 11, Inot 11, Marimat 8, Ybañez 8, Buenavista 2, Mayol 2, Tudtud 2.