83rd cebu city Charter Day Cup sugdan na karong adlawa
CEBU, Philippines — Unom ka teams ang magbugno alang sa korona sa 83rd Cebu City Charter Day Cup commercial basketball tournament nga mosikad na karong adlawa diha sa Cebu City Sports Institute (CCSI) gym.
Ang ASPA makigharong sa Kiboy's Computer Solutions sa pasiunang kumbati sa alas-5:30 sa hapon.
Sa laing mga duwa, ang LM Paragsa ug ang Fighter 50 Wine magsangka sa alas-7 sa gabii, samtang ang SG-ARQ Builders ug ang Athalia maoy mag-abot sa main game sa alas-8:30 sa gabii.
Ang mga entranteng koponan moduwa og single round robin diin ang top 4 moabante sa crossover semifinals. Ang mga mananaog maoy mag-ilog sa titulo karong Pebrero 25, samtang ang pildero magtigi alang sa ikatulong puwesto.
Ang usa ka semanang torneyo nga gipasiugdahan sa kagamhanan sa Dakbayan sa Sugbo pinaagi sa Cebu City Sports Commission ug konsehal Dondon Hontiveros modalit og P325,000 nga ganti sa mga mananaog.
Ang makampiyon mobulsa og P150,000, samtang ang mopahiluna sa ikaduha ngadto sa ikaupat nga dapit makadawat og P100,000, P50,000 ug P25,000.
- Latest