US Team hapit na matupngi sa ubang koponan
CEBU, Philippines — Gitambagan ni NBA legend ug multiple Olympic gold medalist Kobe Bryant ang tibuok Team USA nga dili na maghuna-huna nga sila gihapon ang labing gamhanang basketball team sa kalibotan.
Dugang pa ni Bryant nga angay nilang seryosuhon ang matag torneyo nga ilang apilan.
Si Bryant nga miadto sa China aron personal nga motan-aw sa playoffs sa World Cup, miingon nga wala siya mahibulong nga mataktak og sayo sa quarterfinals ang USA tungod kay nakita niya nga misugod na og kalig-on ang ubang koponan ilabi na ang European teams.
Ang US Team nga gitagak sa France sa quarterfinals, nakahiagum sa labing pait nila nga naabtan sa World Cup diin nalagpot sila sa ikapito nga dapit.
Wala basola ni Bryant ang coaching staff sa Team USA ug bisan sa mga magduduwa sa maong kapildihan, apan gipahimangnoan niya ang kadagkoan sa USA Basketball nga dili mokompiyansa tungod kay hinay-hinay na nga natupngan sa ubang koponan ang kalidad sa U.S Team.
"So I say that to say, put the best players that you think are going to make the best U.S. team out on the floor, we are still going to have challenges. It's not going to be a cakewalk," matud pa ni Bryant sa ESPN.
Si Bryant lakip sa 2008 'Redeem Team' nga midaog og gold medal sa World Cup ug sa Olympics.
Uban niya nga miduwa ang pipila ka mga stars sama nila ni Dwyane Wade, LeBron James, Chris Bosh, Chris Paul, Carmelo Anthony, Jason Kidd, Russell Westbrook ug James Harden.
- Latest