CEBU, Philippines — Napakyas si Carlo Caesar Peñalosa pagdaog sa International Boxing Organization flyweight title human siya mapilde pinaagi sa split technical decision batok sa Mehikanong si Maximino Flores niadtong Domingo sa gabii didto sa Quezon City.
Si Peñalosa nakaangkon og dakong gisi sa iyang kilay sa ikapitong hugna nga mipugos sa ring physician sa pag-undang sa away.
Usa sa mga hurado ang mipabor sa Pinoy boxer, 67-66, apan ang duha mihatag og 67-66 ug 68-67 ni Flores.
Gipakita sa mas taas nga Mehikano ang iyang bentaha sa kasinatian dihang gigamit niya mga jab aron makapundo og puntos batok ni Peñalosa.
Mao kini ang unang pilde ni Peñalosa sa 15 ka away, samtang si Flores misaka sa rekord nga 24-4, 17KOs.
Si Peñalosa pag-umangkon ni two-division world champion Gerry ug Dodie Boy.