CEBU, Philippines — Ang sentro sa Los Angeles Lakers nga si DeMarcus Cousins lagmit dili makaduwa sa tibuok nga bahin sa 2019-2020 NBA season gumikan kay naangol ang wala niining tuhod.
Sa dili maayong balita nga mihampak sa team nga midugang ni Anthony Davis aron ikatumpang ni four-time MVP LeBron James, si Cousins nakahiagum og injury samtang nag-work out didto sa Las Vegas niadtong Martes human magkabangga ang ilang tuhod sa laing player.
Matud pa sa ahente ni Cousins nga si Jeff Schwartz ngadto sa ESPN nga atol sa pagbisita sa mga doktor sa Lakers didto sa Los Angeles kagahapong adlawa, nakompirma nga si Cousins nakasinati sa ikatulo niyang seryoyo nga leg injury sud sa 18 ka bulan.
Wala pa mahibaw-i sa pagka karon kon kanus-a operahan si Cousins.
Nakuha sa Lakers si Cousins isip usa ka free agent niadtong Hulyo ug ila kining gipapirma og usa ka tuig nga kontrata nga mibalor og $3.5 million.
Sa miaging season, si Cousins nakasilbe lamang og 30 ka duwa uban sa Golden State Warriors gumikan gihapon sa injury.
Ang 29-anyos nga si Cousins nakaduwa sa NBA sud sa siyam ka tuig diin siya mi-average og 21.2 points ug 10.9 rebounds matag duwa.