Canillas customs brokerage mikompleto sa 8-0 sweep
CEBU, Philippines – Gikompleto sa Canillas Customs Brokerage ang ilang 8-0 sweep sa elimination pinaagi sa pagpilde sa Petracorta Customs Brokerage, 91-86 sa Cebu Aduana Basketball Legends (CABL) Season 2 niadtong Sabado didto sa Basak gym, Dakbayan sa Sugbo.
Si Rex Bensi mihakot og 19 puntos ug maoy nangulo sa lima ka players sa Canillas Customs Brokerage nga miiskor og double figures.
Nakatampo sab og dako sa kadaogan sa Canillas silang Marvin Sillar ug Ferdi Sigue nga parehong miariya og 15 puntos, samtang sila si James Gambe ug Geryl Bukiron nagkumboya'g 25 puntos sa team ni Roy Canillas.
Anugon kaayo ang 30 puntos nga naiskor ni Francis Palero kay napilde man ang Petracorta Customs Brokerage ni playing team manager Mayor Melchor Petracorta.
Si Reyden Villaronza mitampo og 15 puntos, samtang si Christian Villacastin miamot og 14 puntos sa Petracorta Customs Brokerage nga mitapos sa eliminasyon bitbit ang 5-3 nga baraha.
Sa pasiunang duwa, mihimo og kasikas si Pabling Generalao dihang mipabuto siya og 22 puntos aron pangulohan ang JD&M Customs Brokerage nga mibihag sa Pink Panthers, 84-74.
Ikaduhang topscorer sa JD&M ni Jonathan Matibag mao si Alan Sepe nga mipugnit og 20 puntos, gisundan nilang Amay Palad ug John Mark Jamolin sa ilang 12 ug 10 puntos.
Ang Pink Panthers nilang Art Gonzales ug Richard Rongcales gipangulohan ni Mark Tan nga mipabuhagay og 23 puntos, sila si Jeff Garcia ug Jingjing Rama nagtampohay og 14 ug 10 puntos.
Ang JD&M ug Pink Panthers mitapos sa elimination uban ang 5-3 nga baraha.
Ang liga gipadagan nilang Janno Boniao, Noel Medalle, Ferdinand Sigue, Sidney Ganapin ug Jun Gayo, ingon man ni Roy Canillas isip consultant.
PUNTOS MATAG USA
Unang duwa:
JD&M (84) – Generalao 22, Sepe 20, Palad 12, Jamolin 10, Fuentes 8, Matibag 8.
PINK Panthers (74) – Tan 23, Garcia 14, Rama 10, Gornez 9, Jaca 6, Dela Peña 3, Robinson 3, Duenas 2, Gayo 2.
Ikaduhang duwa:
CANILLAS (91) – Bensi 19, Sillar 15, Sigue 15, Gambe 13, Bukiron 12, Ciabo 5, Dela Cerna 4, Medalle 2, Boniao 2, Belarmino 2, Cabanada 2.
PETRACORTA (86) – Palero 30, Villaronza 15, Villacastin 14, Rys 8, Largosa 7, Nadal 6, Batuto 4, Petracorta 3, Sagarino 2.
- Latest
