99ers Gray kampiyon sa SLS Alumni caging

CEBU, Philippines – Ang 99ers Gray misilyo sa dalaygon nilang kampanya pinaagi sa pagpakurat sa Team White, 71-67  aron sakmiton ang kampiyonato sa St. Louis School Alumni Basketball League 2019 didto sa SLS gymnasium sa Sudlon, Barangay Maguikay Dakbayan sa Mandaue.

Si Mark Sanchez mipupo og 22 puntos, samtang si Paul Alelu Flores ug si Freddie Ibasitas nagkumboya og 27 puntos alang sa 99ers Gray nga nagsandig sa solido niining salida sa endgame aron patikalbungon ang White.

Alkansi og singko puntos human sa tulo ka kuwarter, 42-47, ang 99ers Gray mitak-op sa duwa pinaagi sa 29-20 run aron tumbahon ang White.

Maanindot kaayo ang nakab-ot sa 99ers Gray. Napukan sila sa nag-una nilang tulo ka duwa, apan  mibangon dayon na ngadto sa paglukat sa ikaupat ug katapusang tiket sa semifinals.

Sa crossover semis, ilang gipalayas sa trono ang topseeded nga defending champion Orange sa wala pa bihaga ang White aron birahon ang gihandum nilang titulo.

Sa sayo pa, si Marc Eric Duaman miposa og 22 puntos, samtang si Caesar Dequita midugang og 14 puntos alang sa Orange nga nakaipsot batok sa Black, 99-98, aron sa pagpahiluna niini sa ikatulong dapit.

Ang duha ka bulan nga torneyo nga gisalmotan og walo ka teams gipaluyohan sa SLS Silver Jubilarians (Batch '94). Ang mga duwa ubos sa superbisyon ni commissioner Rey B. Ceniza inabagan ni Danny Basaca.

Ang mga mananaog nga koponan pormal nga pasidunggan atol sa awarding ceremony karong Agosto 3 dungan sa grand alumni homecoming sa SLS.