Pacquiao miarangkada dayon sa iyang training sa Amerika
CEBU, Philippines – Usa pa ka adlaw ang milabay sukad sa iyang pagtaak og balik sa Amerika, walay giusikan nga oras si Pinoy ring star Manny Pacquiao gumikan kay miarangkada dayon kini sa iyang training camp didto sa Los Angeles pangandam sa giatngan nilang sangka ni Keith Thurman sunod bulan.
Kagahapon sa hapon, si Pacquiao, kuyog ang pipila niya ka mga batos ug sakop sa media, midagan sa tungason kaayong dalan didto sa Griffith Observatory.
Sukwahi kini sa naandan nga pagabuhaton ni Pacquiao nga mag-jogging sayo sa buntag didto sa tungason nga Griffith o dili ba sa patag nga Pan Pacific Park didto gihapon sa LA.
Ugma, ang bugtong eight-division world champion sa kasaysayan gikatakda nga makigtagbo ni Hall of Fame trainer Freddie Roach didto sa Wild Card Gym sa Hollywood aron sugdan na ang ilang pagbansay-bansay sud sa gym. Seryoso kaayo si Pacquiao sa iyang training kay gusto niining makab-ot ang labing nindot niyang kondisyon atol sa ilang WBA welterweight championship fight ni Thurman karong Hunyo 20 didto sa MGM Grand sa Las Vegas, Nevada.
Ang 40-anyos nga si Pacquiao dunay 61-7-2 record uban ang 39KOs.
Samtang si Thurman, nga manghod ni Pacquiao og 10 ka tuig, wala pa'y pilde sa 29 ka away diin 22 sa mga biktima niini iyang gipakamang.
- Latest
