CEBU, Philippines – Pormal na nga sugdan ang aksiyon sa Consolacion Lilo-an Basketball Association (CLBA) Season 2 karong gabii diha sa GT Academy gym sa Tayud, Lilo-an.
Tulo ka duwa ang gitakda sugod sa alas-7 sa gabii diin ang moabli sa tabil mao ang multi-titled E-F Surplus ni team owner Fury Trazona nga moharong sa Forwarders ni Genesis Pepito. Sundan kini sa duwa sa J-J Surplus ni Henry Agbon batok sa Nazarene ni Jed Balaod ug dayon sa sangka tali sa Philcement ni Bobong Tiongson ug Princess Shaira ni Rommel Bucatan.
Lain pang mga koponan nga mangahas pagsakmit sa titulo mao ang Broxz Sniper ni Rommel Molo, Jonghap Tang-an ni Kibong, Chichay Chicharon ni Arnel Pepito, 4Nichols ni Sugar Adaptar, Villa Reyna ni Arnold Tariman ug Gilas Pilapilan ni Kingsley Caparroso.
Moduwa sila ubos sa single round robin format sa elimination diin ang top 2 teams makaangkon og 'twice-to-beat' advantage sa quarter-finals. Harungon sa no. 1 ang no. 8 ug no. 2 batok no. 7, samtang magtagakay ang no. 3 batok no. 6, ingon man ang no. 4 batok no. 5. Ang mga mananaog moabante sa semis. Ang mga duwa pagadumalaon sa founder ug league commissioner Fury Trazona.