Rose nagmangtas

CEBU, Philippines — Mihimog career-high nga 50 puntos si Derrick Rose aron pangulohan ang Minnesota Timberwolves ngadto sa 128-125 nga kadaogan batok sa Utah Jazz sa engkuwentro sa mga haring gangis sa NBA Northwest Division kagahapon.

Mangtas kaayo ang gipakitang duwa ni Rose diin daw sa gituyok niini og balik ang orasan human mikadlit og 34 puntos sa second half nga gikahimuot og maayo sa bagang panon sa ilang fans nga misinggit og "MVP, MVP" pagtingog sa final buzzer.

"It was numbing," matud pa sa teammate ni Rose nga si Karl-Anthony Towns,  kinsa miamot og 28 puntos. "I never realized something like that in my life. The man was just out there floating."

Si Rose nga maoy NBA  MVP niadtong 2011 sa dihang nagduwa pa kini uban sa Chicago Bulls, miiskor nga daw sa walay makapugong ug kutob na lamang sa paglingolingo ang Jazz nga daw sa dili makatuo sa iyang mangtas nga duwa.

Milansang si Rose og duha ka krusyal nga free throws sa nahibiling 13 segundos sa duwa nga maoy nakasalbar sa Timberwolves sa sikit kaayong kumbati sa katapusang kuwarter.

Iyang gitak-op ang iyang pagkama-bayanihon pinaagi sa pagtapal sa tres sa Jazz sa nahibiling dos segundos aron silyohan ang ilang daog.

"This means everything,"  matud pa ni Rose. "I am doing everything just to win. I played my heart out tonight. My teammates told me before the game to just play my game and it was a hell of a night."

Si Donovan Mitchell maoy nangu sa Jazz uban ang   26   puntos, samtang sila si Rudy Gobert ug Jae Crowder nagkumboya'g 40 puntos sa pilderong Jazz.