Dissenting Bad Boys kampiyon sa IBP-Cebu caging

CEBU, Philippines — Ang Dissenting Bad Boys milusad og nagbagang opensiba sa ikatulong kuwarter ug dayon kalmadong miduwa taliwala sa presyur sa endgame dayon na ngadto sa pagpakaging sa Gilas Defenders, 72-70, sa kulbahinam nilang final match aron sakmiton ang kampiyonato sa Integrated Bar of the Philippines (IBP)-Cebu Basketball League diha sa Capitol Parish gym.

Tam-is kaayo nga panimalos ang nakab-ot sa Dissenting Bad Boys nga gitagak sa Gilas Defenders sa semifinals sa miaging season. Ang Gilas Defenders milahos ngadto sa pagka-kampiyon human gipukan ang Super Idols.

Daw sa madepensaan sa Gilas Defenders ang ilang trono human sila mibulhot ngadto sa 14 puntos nga labaw sa halftime, 37-23, gumikan sa mainit nga mga kamot nilang Van Ligutan, Frank Dinsay ug Roel Juban.

Apan ang Bad Boys nilang team owners Fiscal Bads madasigon nga miresbak pinaagi nilang Fiscal Ryan Sojor, Richard Bauzon, Judge Ferdie Riveral ug Kenneth Kernn Sesante nga mipasiugda og nagkayong 23-7 ataki nga nakapalabaw sa Bad Boys og dos puntos, 46-44, human sa tulo ka kuwarter.

Ang Bad Boys nakamintinar og sayes puntos nga bintaha sa pinal nga tres minutos. Wa sab hinoon magpaalkansi ang Gilas Defenders nga miwadwad og 7-0 rally aron pag-abante niini og balik og usa ka lugas.

Apan sila si Sesante ug Noel Bragat misalbar sa Bad Boys pinaagi sa paglansang sa krusyal nilang free throws sa hilimatyong oras nga nahibilin nga maoy nagpalutaw kanila sa panganod sa himaya.

Si Sesante mitagak og 10 sa iyang 12 puntos sa final half, samtang si Bragat mitapos og sayes puntos apil na ang nakapadaog niyang free throws.

Nangu sa Bad Boys si Sojor bitbit ang 15 puntos, samtang si Richard Bauzon mitali og 14 puntos.

“A stunning win by an underdog and bunch of old guys. Down by 17 and we managed to cut the lead and ultimately winning by 2 points. A great team effort, unselfish plays, and finishes by Fiscal Ryan Sojor,” matud pa ni Bad Boys team manager Jonas Asis.

Ang ubang miyembro sa Bad Boys mao sila si Weng Dumon, Edward Bauzon,Fiscal Jepoy Badilles, Deo Albeos, Patrick Esmeralda, Fiscal Narido, Gio Sususco, Reyner Apolinario, Archie Puspus, ug Tadz Tumaodos.

Sila si Dinsay ug Ligutan nagkumboya og 29 puntos alang sa Gilas Defenders, samtang si Juban miamot og 14 puntos sa pilderong kawsa.

Mga iskor

Dissenting Bad Boys (72) – Sojor 15, R. Bauzon 14, Sesante 12, Bragat 6, E.

Bauzon 5, Apolinario 5, Riveral 4, Albeos 4, Dumon 3, Badilles 2, Asis 2

Gilas Defenders (70) – Dinsay 15, Ligutan 14, Juban 11, Ajoc 9, Remedio 6,

Gepolongo 3, Lagahit 3, Ang 3, Hupp 3, Arnaiz 2, Valecer 1

Quarterscores: 16-21;23-37;46-44;72-70. (BANAT NEWS)