CICS Open chessfest banatan karon

CEBU, Philippines – Setenta ka mga magduduwa og ahedres ang magtakus sa ilang abilidad sa Cebu International Chess Society (CICS) Open Tournament nga banatan na karong adlawa diha sa Robinson's Galeria Cebu.

Gawas nga maka-angkon og puntos alang sa ilang National Chess Federation of the Philippines (NCFP) ratings, ang mga mananaog makadawat sab og tropeyo ug ganting salapi.

Ang makampiyon mobulsa og P3,000, samtang ang mopahiluna sa ikaduha ngadto sa ikaupat nga dapit makadawat og P2,000, P1,000 ug P700. Ang motapos gikan sa ikalima hangtod sa ika-10 dunay P500 matag usa.

Ang top kiddie finishers sa under-10, U12 ug U15 age groups hatagan og bonus nga P1,000 matag usa.

Kadtong wala pa makaparehistro, mahimo  pang makasalmot gumikan kay ang mga organizers modawat man og 'on-site' registration sa dili pa magsugod ang torneyo sa alas-10 sa buntag.

Ang entry fee nagkantidad og P200 sa kiddies ug P250 sa open category.