Orange team kampiyon sa CBA basketball tournament 2018

CEBU, Philippines – Taliwala sa mga hulga, ang Orange team nakahimo gihapon sa pag-eskapo bitbit ang 108-102 nga kadaogan batok sa Black team aron pagsakmit sa kampiyonato sa 2018 Carmen Basketball Association (CBA)  tournament niadtong Agosto 6.

Maisip kini nga bawos sa Orange ngadto sa Black nga mipilde kanila atol sa una nilang panag-abot ug mao sab ang bugtong nakabuling sa baraha nila, 6-1.

Wala kapugngi si Jerry Jaca sa iyang pagmangtas ug miburak kini'g 20 puntos aron mangulo sa unom ka Orange players nga miiskor og double digits.

Sa eksplosibo niyang duwa, si Jaca maoy gipasidunggan nga Most Valuable Player uban ni Rey Kikoy Castro.

Maayo kaayo ang opensa sa Orange team sa nag-unang duha ka kuwarter hinungdan nga miabante sila og 20 puntos sa halftime, 68-48. Apan ang maong labaw gikalingawan og kitkit sa Black ug nakan-an pa kini ngadto na lang sa otso puntos pag-entra sa fourth period sa kombinasyon nilang Bantam Ruiz ug Baloy Dimco nga nakahulga sa Orange team.

Hinuon, naprotehian sa Orange team ang gamay nilang labaw hangtod nahuman dungan sa pagkapawong sa paglaum sa Black team.

Laing lima nga naka-double figures sa Orange team mao sila si Adolfo, Marino Castro, Bano Quingco, Odelio Bejoc ug Boboy Abellanosa.

Si Inting Bejoc mao sab ang nangu sa Black nga mibagnos og 22 puntos, gisundan ni Ruiz sa iyang 21 puntos. Sila si Dimco ug Boy Fernandez nag-amotay og 17 puntos sa Black.

Ang liga nahimong posible  tungod   sa   wa'y kinutobang  suporta   ni Kongresista  John Bertiz III.

Nagpadagan sa maong liga mao si commissioner Jun Capangpangan.

Ang mga opisyal sa CBA nga 22-anyos na, naglakip nila ni Titing Laping (president), Renante Subeta (vice president) ug Rodel Ferrer (secretary/treasurer). Si Osting Morales maoy ilang consultant, samtang sila si Tomas Basaka ug Boboy Into  isip mga barkers.

PUNTOS MATAG USA

ORANGE (108) – Jaca 20, Adolfo 16, Castro 15, Quingco 13, O. Bejoc 12, Abellanosa 10, Quimco 6, Tungal 5, Laurio 5, Luchavez 4, Abayon 2.

BLACK (102) – I. Bejoc 22, Ruiz 21,  Dimco 17, Fernandez 17, Maningo 8, Hermosilla 6, Bravo 4, Mata 2, Lumen 2, Benitez 2, Castro 1.