Novtek-Federal batok COH-Reclamation mag-abot sa 2nd CHBC pardo Ballclub tourney
CEBU, Philippines – Miagi pa og lubakon nga dalan ang 'twice-to-beat' Novtek-Federal una nila mataak ang tungason nga kadaogan batok sa CHBC Pardo-A, 111-108 sa semifinals sa CHBC Pardo Ballclub Second Conference niadtong Biyernes didto sa UBCA gym sa Quiot, Pardo, Cebu City.
Labaw og 14 puntos ang Novtek-Federal sa first period, 29-15, apan gihinay-hinayan kini og kitkit sa CHBC Pardo-A sa pagpangulo nilang G. Abellanosa, Bacatan, Martillan ug Fordy Bilocura. Gani nilabaw pa ang Pardo-A, 80-76 pagtapos sa third quarter.
Apan napukaw ang nagdamgo nga opensa sa Novtek-Federal diin ang idlas nga point guard nga si N. Peralta maoy midagkot sa naglagiting nga opensa aron mailog og balik ang labaw dayon na pagkulit paglangkat og luna sa finals.
Sa laing semifinals match, ang COH-Reclamation yano kaayong mikusokuso sa COH-Plaridel 2 gikan sa pagsugod hangtod napupos ang oras aron motaak sa finals sa labing unang higayon.
Midaog ang COH-Reclamation sa iskor nga 90-84.
Gumikan sa maong kadaogan, ang COH-Reclamation ug Novtek-Federal maoy mag-abot sa finals nga gikatakda ugma, samtang ang COH-Plaridel ug CHBC Pardo-A mag-ilog na lang alang sa ikatulong puwesto.
Ang liga ubos sa superbisyon ni chairman James Palioc uban sa iyang mga sakop nga naglakip nilang Gabriel Salomon, Dortads Bilocura, Gyle Martillan, Joseph Abellanosa, Nelson Villaso ug Pablo Cabrera.
PUNTOS MATAG USA
Unang duwa:
COH Reclamation (90) – Desuyo 17, Olmedo 12, F. Quiambao 10, R. Quimbao 8, Romero 8, Torque 8.
COH Plaridel (84) – G. Corpuz 28, A. Abejar 20, Dayanan 12, Fuentes 8, Amolo 7.
Ikaduhang duwa:
Novtek-Federal (111) – N. Peralta 35, Yule 22, F. Sollano 10, C. Romano 10, Uy 10.
Pardo A (108) – G. Abellanosa 30, C. Bacatan18, R. Tungon 10, J. Juhan 10, Martillan 7, Bilocura 7.
- Latest
