Friends kampiyon gihapon sa laba

CEBU, Philippines — Nagmalampuson ang hiniusang puwersa sa Friends sa ilang kampanya pagpanalipod sa ilang korona human ilang gipilde ang karibal nilang Monterroyo/Co-Jordan sa finals, 54-41 alang sa ilang 'back-to-back' championships sa LABA Basketball Tournament 2018 niadtong Biyernes didto sa Co Tiao King gym sa Tabok, Mandaue City.

Si Ramie Suson miiskor og nuybe sa iyang 13 puntos sa fourth quarter aron pangulohan ang balanseng ataki sa Friends/Butch Surveying. Dako  sab og natampo sa kadaogan si Jong Cabonilas nga miamot og 10 puntos.

Ang Monterroyo/Co-Jordan gipangulohan sab ni Michael Tañan nga mibugha og 14 puntos, apan wala siya makakuha og igong suporta gikan sa iyang kaubanan nga maoy nakaingon sa kapildihan sa team nilang Dr. Raul Monterroyo ug Richard Jordan.

Pulos lig-on og depensa ang gihimo sa duha ka kampo hinungdan nga gahi kaayo silang nakapasud  sa ilang opensa pagsugod  ug natapos ang unang 10 minutos sa duwa sa iskor nga 11-8 pabor sa Friends.

Human sa 20-10 nga bentaha sa tunga-tungang bahin sa second quarter, kontrolado na sa Friends ang duwa ug wala na sila motugot nga makasikit pa ang Monterroyo/Co-Jordan hangtod nahurot ang oras.

Sa pasiunang duwa, ang Sebandal mipukan sa AC Troopers,  69-67 pinaagi sa overtime  aron  pagsakmit sa third place trophy.

Ang duha ka free throws ni Benjie Pelarios maoy nagda'g daog sa Sebandal. 

Ang liga nga gipaluyohan sa Bol-anon Eatery nagmalampuson tungod sa pagtinabangay sa grupo ubos sa liderato sa bag-ong presidente nga si S/Insp. Dondon Coloscos.

PUNTOS MATAG USA

Unang duwa:

SEBANDAL (69) – Canjo 14, Bercero 13, Grafe 10, Cañas 8, Pelarios 6, Sebandal 6, Yares 4, Ramos 3, Adulfo 3, Ubas 2.

AC Troopers (67) – Gonzaga 14, Oquias 10, Chavez 8, Cabahug 7, Coloscos 6, Saldua 6, Englis 5, Acusar 3, Lavadorr 2, Borga 2, Tayag 2, Limosnero 2.

Ikaduhang duwa:

FRIENDS (54) – Suson 13, Cabonilas 10, Federez 5, Tantuan 5, Son 4, Vios 4, Herbieto 4, T. Alcover 3, Panugaling 2, Mahusay 2, Cabucos 2.

MONTERROYO (41) – Tañan 14, Catinoy 6, Sugay 4, J. Landiza 4, Armero 3, W. Landiza 2, Mendoza 2, Beldera 2, Monterroyo 2, Jordan 2.