George andam na sa 'boos' sa fans

CEBU, Philippines — Giandam na ni NBA All-Star Paul George ang iyang kaugalingon alang sa grabe unyang kantyaw ug 'boos' gikan sa mga fans sa Indiana Pacers nga naglagot human siya mibalhin sa Oklahoma City Thunder atol sa off-season.

Si George nahimong haligi sa Pacers diin kaduha niya gituboy ang koponan sa Eastern Conference finals, apan nakahukom siya nga mobiya human sa miaging season ug mobalhin sa Thunder  aron ikauban niya ang duha pa ka stars nga sila si Carmelo Anthony ug Russell Westbrook.

Giklaro ni George nga dili siya angay magpaapekto tungod kay mas mahinungdanon kaniya ang mahatagan og daog ang Thunder nga naglisud karon sa sayong bahin sa season sa ilang 12-14 win-loss record.

Sukwahi kini sa nahitabo karon sa Pacers nga anaa sa ikalimang dapit sa East Conference sa ilang 16-11 record ubos sa liderato ni Victor Oladipo. (BANAT NEWS)