Blatche sayung mouban sa Gilas training
CEBU, Philippines — Di sama sa mga nahitabo kaniadto, misaad ang kampo ni naturalized center ug ex-NBA cager nga si Andray Blatche nga sayu siyang moanhi sa nasud aron mouban sa ensayo sa Gilas Pilipinas pangandam sa 2019 FIBA Asia World Cup qualifiers.
Si Blatche gitakda nga moabot sa nasud sa Nobiyembre 12 diin may igong panahon pa siya nga maka-ensayo uban sa koponan sa dili pa ilang unang duwa batok sa Japan sa Nobiyembre 24 didto sa Tokyo.
Sa ilang bahin, angay pangandaman ang Japan nga mipagawas na usab sa ilang 22-man lineup nga gilangkuban sa ilang naturalized player nga si Ira Brown. Mga bantayanan sa Japan mao ang hingigo nga Takeuchi brothers nga sila si Joji ug Kosuke, Makoto Hiejima, Takuya Kawamura ug Naoya Kumagae.
Ang Gilas mopadayun sa ilang training karong semanaha diin si coach Chot Reyes naglaum nga daghan pa ang mutunga. Nananghid na hinuon daan nga dili una mo-ensayo sila si Kiefer Ravena ug Terrence Romeo kinsa nagbakasyon pa sa laing lugar. — (BANAT NEWS)
- Latest