Mayweather, Mcgregor gipikhan

CEBU, Philippines - Walay bisan gamay nga interes si Oscar de la Hoya  nga masayod pa sa resulta sa away nilang Floyd Mayweather Jr. ug Conor McGregor niadtong Domingo.

Mao sab kini ang sentimento ni middleweight champion Gennady Golovkin nga miyam-id sab sa maong ideya kay mas maayo pang ibubo ang bililhon niyang oras ngadto sa iyang pamilya kay sa sutaon kon kinsa’y modaog sa giisip niyang bugal-bugal nga away.

Matud pa ni De la Hoya nga ang away nilang Mayweather ug McGregor usa ka dakong ilad ug usa ka pagdisrespeto sa kalibotan sa boksing. Sa iyang tan-aw, usa lamang ka pasundayag ug dili tinuoray nga away ang nahitabo.

Sa maong kontrobersiyal nga away didto sa T-Mobile Arena sa Las Vegas, si Mayweather midaog pinaagi sa TKO sa ika-10 nga hugna aron pagkulit og makasaysayanong 50-0 record. Apan daghan ang wala mobilib niini, apil na si De la Hoya. Bisan tuod og dunay daghang nanan-aw, apan alang sa gitamod nga 'Golden Boy', ang tinuoray nga boksing masaksihan lamang sa fans sa panagsangka unya nilang Golovkin ug Canelo Alvarez karong Septiyembre 16 sa susamang binyu diin nag-abot silang Mayweather ug McGregor. (BANAT NEWS)