UC bantams daog na gyud
CEBU, Philippines - Ang University of Cebu (UC) Junior Webmasters milusad og nagbagang opensa gikan sa sinugdanan aron paglampurnas sa Cebu Institute of Technology-University (CIT-U) Wildkittens, 77-62 alang sa una nilang daog sa 17th Cebu Schools Athletic Foundation, Inc. (CESAFI) kagahapon diha sa Cebu Coliseum.
Si John Bryl Cuyos mikadlit og 21 puntos, si Virlou Orquez miiskor og 16 puntos, samtang sila si Dave Peligrino ug Miguelito Jusay nagkumboya’g 17 puntos alang sa UC bantams nga wala na mopaginhawa pa sa Wildkittens human sila misutoy ngadto sa 38-22 nga labaw sa halftime.
Kontrolado na sa Junior Webmasters ang duwa sukad niadto ug milabaw pa gani sila og 24 puntos, 67-43 sa nahibilin nga singko minutos dayon na ngadto sa pagpakgang sa duha ka sagunson nga pilde.
Si Kirk Suson mitapos uban ang 17 puntos ug si Marion Abinuman dunay 13 puntos, apan naminghoy sila gumikan kay ang Wildkittens nasugamak ngadto sa ikaupat nilang sunod-sunod nga pilde.
Sa sayo pa, si John Galarse mitikdol og 17 puntos ug sila si Joshua Baruc ug Andre Gabutero mipupo og 14 puntos matag usa alang sa Cebu Eastern College (CEC) Dragons nga nakaipsot batok sa Don Bosco Greywolves, 62-60 alang sa ikaduha nilang daog sa tulo ka duwa. (BANAT NEWS)
- Latest
