CESAFI coaches managlahi ang opinyon

SAINT BERNARD, So. Leyte — Ang mga coaches sa Cebu Schools Athletic Foundation, Inc. (CESAFI) mipadayag og managlahing baruganan kabahin sa kun unsay posibleng resulta sa NBA Finals trilogy tali sa Cleveland Cavaliers ug Golden State Warriors nga magsugod upat ka adlaw gikan karon.

Ang tinamod nga si Raul 'Yayoy' Alcoseba, nga mao na karon ang head coach sa University of Cebu Webmasters, mitagna ang maong serye molanat ngadto sa pito ka duwa diin ang Warriors maoy moguwang mananaog.

"It's the Warriors in seven," matud pa ni Alcoseba nga maoy giyukboan nga winningest coach sa kasaysayan sa  Cebu basketball . "I think the Warriors are hungrier this time because they have an unfinished business against the Cavs."

Alang ni Alcoseba, ang presensiya ni All-Star forward Kevin Durant makatabang og dako sa tinguha sa Warriors nga makabawos batok sa Cavs.   

Sa pagduwa ni Durant uban nilang Stephen Curry, Klay Thompson ug Draymond Green, si Alcoseba naglantaw sa usa ka kulbahinam nga match-up tali sa Warriors ug Cavs kansang puwersa dili sab mabangbang ubos sa pagtimon nilang four-time MVP LeBron James, Kyrie Irving, Kevin Love ug Tristan Thompson.

Samtang atensiyon adto mapunting sa mga superstars, si Alcoseba nagkanayon nga ang bench nagdala sab og dako nga papel sa serye.

"Given the superstars from both sides, I think the bench will play a key role in the series. In the end, it all boils down on whose bench will deliver," dugang pa niya.

Si coach Mike Reyes sa Southwestern University-Cobras miuyon sa panahom ni Alcoseba bisan tuod og adto siya pabor sa Cavs.

"I think the Cavs have the advantage because of LeBron James. Nobody can't stop them," dason pa ni Reyes. "But it all depends on how the bench will respond because it is crucial in a seven-game series."

Samtang ang Warriors dunay Andre Igoudala, Shaun Livingston, David West ug Javel Mcgee, ang Cavs duna say Kyle Korver, Richard Jefferson, Iman Shumpert ug Deron Williams nga makuot sa ilang bench.

Sa iyang bahin, si University of the Visayas Green Lancers coach Gary Cortes way kurat nga mitagna nga mopatigbabaw sa serye sud sa unom ka duwa.

"I'm for Cavs in six games,"matud pa ni Cortes,nga nakadaog og CESAFI title sa ikaduha pa lamang nga tuig niyang pag-coach sa Lancers.  "Aside from having LeBron James, without question the most dominant player on the planet today, the Cavs also peaked at the right time. That will surely make a difference in the series. Their recruits also proved that they are worthy members of the champion team."

Gawas ni Cortes, lain pang mipabor sa Cavs mao sila si University of San Carlos Warriors coach Bong Abad ug UC assistant coach Caleb Gawangon.

Ang Warriors magbitbit og 12-0 record sa pag-asdang nilang sa ikatulong sagunson nga finals showdown batok sa Cavs nga sugdan karong Hunyo 2 didto sa  Oracle Arena sa Oakland, California.

Managlahi man tuod ang ilang panglantaw apan segurado nga usa kini ka pisikal, kulbahinam ug puno sa emosyon nga serye nga angayan lantawon ug subayon sa mga fans. -EBV (BANAT NEWS)