UV mopahigayon og basketball tryouts

CEBU, Philippines - Ang University of the Visayas (UV) mopahigayon og sunod-sunod nga tryouts sa nagkadaiyang dapit sa Kabisay-an ug Mindanao sa tinguha nga palig-onon pa ang programa alang sa ilang SBP, Passerelle, high school ug collegiate basketball teams.

Pasiugdahan ni UV talent scout Van Halen Parmis, ang serye sa tryouts mosikad karong Abril 10-11 didto sa Rotary gym sa Tagum City, Davao del Norte gikan sa ala-1 hangtod sa alas-5 sa hapon.

Pagasundan kini sa Leyte tryout karong Abril 17-21 didto sa Franciscan College of the Immaculate Conception (FCIC) gym sa Baybay City gikan sa alas-7 sa buntag hangtod sa alas-4 sa hapon.

Tapuson sa UV ang pagpangita  og mga talento dinhi sa Sugbo karong Mayo 1-5 diha sa UV-Main gymnasium gikan sa alas-4 sa hapon hangtod sa alas-8 sa gabii.

Abli sa mga lalaki nga basketbolista nga nag-edad og 10 hangtod sa 22-anyos, ang tryout kabahin sab sa preparasyon sa UV Green Lancers alang sa pagdepensa nila sa ilang titulo sa 17th Cebu Schools Athletic Foundation, Inc. (CESAFI) season nga magsugod karong Agosto diha sa Cebu Coliseum. (BANAT NEWS)