Cavs pilde na gyud

CEBU, Philippines - Mihimo og career-high  28 puntos si Dennis Schroder  alang sa Atlanta Hawks nga mipatilaw sa defending champion Cleveland Cavaliers sa labing una niining pilde,  110-106 sa nagpadayong aksiyon sa NBA kagahapon didto sa Quicken Loans Arena sa Cleveland, Ohio.

Midugang og 25 puntos si Kent Bazemore, apil na ang iyang 3-pointer nga maoy nakainat sa ilang labaw ngadto sa sayes puntos, 101-95 sa nahabilin nga 3:33 sa duwa, samtang si Paul Millsap mikadlit og 21 puntos alang sa Hawks  nga mipakgang sab sa 11 ka sagunson nilang pilde sa mga kamot sa Cavs.

“We were tired of getting pushed around by Cleveland and we wanted to beat these guys,” matud pa sa sentro sa Hawks nga si Dwight Howard  nga milangkat og 17 ka rebounds. 

Human si Kevin Love mipasud sa iyang tres aron pagpasikit sa Cavs ngadto sa 106-108, si Bazemora mipasud sa iyang baseline jumper nga maoy nagtuldok sa kadaugan sa Hawks.

Si Kyrie Irving miratsada og 29 puntos, si LeBron James mibahug og 23 puntos, siyam ka rebounds ug lima ka assists, samtang si Love dunay 24 puntos ug 12 ka rebounds, apan nakawang ang ilang paningkamot kay naputol ang unom ka sunod-sunod nga daog sa Cavs.

Sa laing mga duwa, si Marc Gasol mihipos og 19 puntos, apil na niini ang iyang buzzer-beater nga maoy nag-agak sa Memphis Grizzlies ngadto sa kulbahinam   nga kadaugan batok sa Denver Nuggets sa iskor nga 108-107, samtang si Brook Lopez mipabuto og 26 puntos sa dihang gipiog sa  Brooklyn Nets ang Minnesota Timberwolves, 119-100.

Si Damian Lillard mipatuasik og 38 puntos, apil na niini ang mga krusyal nga free throws nga maoy nagtuboy sa Portland TrailBlazers ngadto sa 124-121 nga daog batok sa Phoenix Suns, sila si Harrison Barnes ug Seth Curry nagkumboya’g 54 puntos sa dihang gipilde sa Dallas Mavericks ang LA Lakers,  109-97.

Si DeMarcus Cousins mitali og 11 sa iyang 28 puntos sa katapusang kuwarter aron paggiya sa Sacramento Kings  pagpukan sa New Orleans Pelicans, 102-94. (BANAT NEWS)