USPF, SHS-AdC kampiyon sa CESAFI volleyball

CEBU, Philippines - Milampos ang University of Southern Philippines Foundation ug Sacred Heart School-Ateneo de Cebu paglangkat sa kampiyonato sa tagsa-tagsa nila ka dibisyon sa Cebu Schools Athletic Federation Inc., juniors volleyball event kagahapon didto sa University of San Carlos gym.

Ang USPF miputol sa walo ka tuig nila nga huwaw sa kampiyonato human nila gilampornas ang USC sa Game 3 sa ilang best-of-three finals series, 27-25, 25-19, 27-25.

Human nila matabla ang serye sa Game 2, ang USPF mipakita nga mas gutom sila sa korona dihang gibanatan nila ang USC sa opensa sa pagpangulo nila ni Pol Gringo Salvador ug Ruel Sarnejo. Misuway pagsukol ang mga Carolinians sa third set gamit ilang mga tira, apan wa sila kapanagang sa atake ni Mark Joseph Enriquez kinsa maoy mihatud og mga krusyal nga puntos alang sa USPF.

Sa ilang bahin, ang SHS-Ateneo girls mitilaw sa labing una nilang korona sa CESAFI sukad sa ilang pagsalmot niadtong tuig 2011. Dili hinuon sayun ang mga kadaugan tungod kay kinahanglan pa nila nga moabot ngadto sa four-sets aron madispatsar ang University of San Jose-Recoletos, 25-16, 25-11, 22-25, 25-23.

Human milabaw sa unang duha ka sets, milugak ang depensa sa SHS-Ateneo rasun nga nakuha sa USJ-R ang third set.

Wala hinuon maratol ang SHS-Ateneo lady spikers ug ilang gibawsan og init nga atake ang USJ-R sa paningkamot nila ni Danielle Marie Malazarte, Angelyna Grace Canieso ug Jennifer Louise Delos Santos. (FREEMAN)