Nietes bunyagan na
CEBU, Philippines - Bunyagan na og kayo isip flyweight si two-division world champion Donnie ‘Ahas’ Nietes sa ALA Boxing Gym sa dihang iyang harungon si ex-WBC light flyweight titlist Edgar Sosa sa Mexico sa main event sa “Pinoy Pride 38: Philippines vs. Mexico” karong buntag oras dinhi sa Pilipinas didto sa StubHub Center sa Carson, California.
Ilogan sa 12 ka hugna nilang kumbati ang WBO International flyweight title.
Si Nietes (38-1-4, 22KOs) eksaktong mitimbang og 112 ka libras, samtang si Sosa (53-9, 30KOs) dunay gibug-aton nga 111.5 ka libras atol sa official weigh-in kagahapon didto sa East Rock Plaza Mall.
Ang 34-anyos nga si Nietes boluntaryong mibakante sa iyang trono isip WBO light flyweight champion aron mokampanya sa flyweight division sa tinguha nga makapuwesto og superbout batok ni WBA/WBO king Juan Francisco Estrada.
Apan daw sa dili pa kana ang mahitabo sa unahan gumikan kay si Estrada bag-o pa man sab nga mibakante sa iyang mga titulo gumikan sa laraw niini nga mapuwersa og megabout batok sa wa’y pildeng pound-for-pound king nga si Roman Gonzalez sa Nicaragua.
Hinuon, ang garbo sa Murcia, Negros Occidental kinahanglan gihapon nga mohimo og impresyon aron magabaton og saktong sinugdanan sa iyang ambisyon nga mosakmit sa ikatulo niyang world title sa managlahing weight division.
Kun ugaling molampus batok ni Sosa, posible niya makasangka sunod si Zou Shiming (WBO No. 2) o Kwanpichit Onesongchai (WBO No. 3) alang sa WBO title sunod tuig.
Gawas ni Nietes, ang wa’y pildeng featherweight prospect nga si Mark ‘Magnifico’ Magsayo (14-0-0, 11KOs) ug WBO Asia Pacific bantamweight champion ‘King’ Arthur Villanueva (29-1, 15KOs) moaway sab sa ikatulong Pinoy Pride event sa ALA Promotions ug ABS-CBN Sports didto sa Amerika.
Si Magsayo modepensa sa iyang WBO International featherweight title batok ni Ramiro Robles (13-5-1, 8KOs), samtang si Villanueva makigtige ni Juan ‘Pineta’ Jimenez (22-10) sa ilang rematch. (BANAT NEWS)
- Latest
