Suzuki-Ciaz nanghawod sa San Roque bootfest

CEBU, Philippines - Ang Team Ciaz ubos sa Suzuki FC nakaipsot batok sa Barili FC pinaagi sa penalty shootout, 3-2 aron pagsakmit sa men’s title sa San Roque Football Cup niadtong Domingo didto sa San Roque Parish field sa  Subangdaku, Mandaue City.

Sila si Elmer Pacubas, Kurt Acre ug Erwin Morrok maoy migiya sa Suzuki-Ciaz ngadto sa kadaugan. Daku sab ang natabang sa ilang goalkeeper nga si  Benjamin Sanchez, kansang pagsalbar sa bola nasanta sa tinguha sa Barili FC  nga makatilaw og kampiyonato.

Sa women’s division, ang San Roque FC maoy gikoronahang hara human ilang gipukan ang Warrior FC, 2-1 pinaagi gihapon sa penalty shootout.

Sa age-group, ang Sacred Heart School-Ateneo de Cebu mihakot og upat ka titulo, samtang ang Don Bosco Technology Center mikabkab og tulo ka korona  nga maoy labing daugan nga teams sa 153 ka mga entrante. Ang SHS-AdC maoy naghari sa boys 13, 15 ug 17 ug girls 14 category, samtang ang Don Bosco midominar sa players 7 ug 9 boys 11.

Sa 40-above class, ang KN Ferraren maoy naghari human nakaeskapo, 3-2  batok sa gikaintapang Queen City United. (BANAT PALARO)