Stallions mipahamtang og pilde sa Converters
CEBU, Philippines - Ang Lexmark Stallions milusad og endgame rally aron pagbuntog sa kanhi wa’y pildeng defending champion Convergys Converters, 59-51 sa 12th CSCC E-League men’s basketball tournament niadtong Sabado didto sa City Sports Club-Cebu gym.
Si Niel Tiempo mitapos og 14 puntos, samtang si Jan Oneil Sahilan midugang og 10 puntos alang sa Stallions nga nakigsawo na karon sa liderato sa Elite Classic uban sa ilang biktima bitbit ang managsamang 4-1 nga baraha.
Alkansi og kuwatro puntos ang Stallions human sa tulo ka kuwarter, 39-43, apan mipabuto kini og makabungog nga 20-8 nga bomba sa naghinapos nga bahin sa duwa aron pagpakurat sa Converters.
Sa Evo League, ang QBE Generals nakalingkawas batok sa United Health Group Cobras, 71-69 aron pag-inat sa wa’y tatsa nilang rekord ngadto sa 7-0. Ang Cobras nakatilaw sa ikaupat niining pilde nga giatbangan og duha lamang ka daog.
Sa laing mga duwa, ang Contact Solutions Flying Lemurs mipilde sa Teletech Titans, 77-71 alang sa ilang 3-3 nga baraha, samtang ang Author Solutions, Inc. Hardbacks nakaeskapo batok The Results Company Spartans, 64-62 alang sa ikatulo nilang daog sa lima ka duwa. (BANAT NEWS)
- Latest
