2019 World Cup, 2020 Olympics tuyo sa Gilas

CEBU, Philippines - Molampos man o sa dili sa Olympic qualifying tournament, ang Samahang Basketball ng Pilipinas (SBP) mibutyag na nga padayon ang ilang misyon aron ibalik ang nasud sa entablado sa basketbol.

Sa pagporma sa ilang Gilas cadet program, si SBP official Butch Antonio nagkanayon nga nahikyad na nila ang plano sa umaabot nga tahas nga mao ang 2019 FIBA World Cup didto sa China ug 2020 Olympics sa Tokyo, Japan.

Gilantaw sa SBP nga maglisud na pagduwa ang mga PBA players alang sa Gilas tungod sa bag-ong format sa FIBA nga himuon nang home-and-away sa ilang mga torneyo.

Tungod niini, ang SBP moporma og koponan gikan sa mga amateur players nga mamahimong mainstay sa national team. Malakip niini sila si Keifer Ravena, Mac Belo, Jio Jalalon ug Mike Tolomia.

Gidugang sa SBP nga ang pagtutok sa maong mga players sa national team makaseguro nga makaporma ang nasud og lig-ong national team nga moduwa sa mga international tournaments. (BANAT NEWS)