Raptors nakatabla

CEBU, Philippines - Mikolapso ang Toronto  human nakalabaw og 18 puntos sa sayong bahin sa ikatulong kuwarter, apan sila si Kyle Lowry ug DeMar DeRozan dali nga nakaaksiyon aron pagsalbar sa Raptors ngadto sa kulbahinam nga kadaugan batok sa Cleveland Cavaliers, 105-99  ug ingon man pagtabla sa ilang “best-of-seven” Eastern Conference finals  series,   2-2 kagahapon didto sa Air Canada Centre sa Toronto, Canada.

Si Lowry miposa og 35 puntos ug si DeRozan mikadlit og 32 alang sa Raptors nga wala damha mopakurat sa inilog nga Cavaliers sud sa duha ka sunod-sunod nga higayon. Sa fourth quarter, nagkumboya sila og 21 puntos nga nakahimo og dakung kadaut sa kampo sa Cavs.  

Maayong labok ang gipakita sa Raptors gikan sa sinugdan ug sa usa ka higayon miabante sila og 18 puntos, 59-41 sa second half.

Ubos sa pagpangu nilang LeBron James nga mitapos og 29 puntos ug Kyrie Irving, ang Cavs milusad og rally nga wala lamang makapapha sa ilang alkanse,  apan nakapalabaw sab kanila og tres puntos, 92-89 sa nahibiling singko minutos sa duwa. Apan mao  kadto ang katapusang hunat sa Cavs gumikan kay ang   Raptors  milusad sab og kaugalingon nilang rally. 

Daku sab og natampo sa Raptors si DeMarre Carroll nga miamot og 11 puntos ug ingon man si Bismack Biyombo nga milangkat og 14 ka rebounds gawas nga miladlad og maayong depensa nga nakahasol og maayo sa Cavs ilabi na sa first half. (BANAT NEWS)