Wa gihapon kapugngi

CEBU, Philippines – Wala gihapon kapugngi ang reigning NBA champion  Golden State Warriors nga aduna na karo’y 17-0 record human ilang gilubong ang Phoenix Suns, 135-116 kagahapon sa nagpadayong   2015-2016 NBA season didto sa U.S. Airways Center sa Phoenix, Arizona.

Ang  NBA MVP nga si Stephen Curry miburak og 41 puntos nga naglakip og siyam ka three-pointers aron inaton ang ilang winning streak ngadto sa 17 ka daog.

Ang Warriors mihimo og season-high 22 ka three-pointers  ug  may 56.8 percent gikan sa field ug 57.9 sa ilang three-point attempts.

Si  reserve guard Leandro Barbosa midugang og  21 puntos, lakip ang lima ka three-pointers alang sa Warriors.

Mihimo sa ikaduha niyang triple-double karon nga season si Draymond Green human miiskor og 14 puntos, 10 ka rebounds ug 10 sab ka assists, samtang si Klay Thompson miabuno’g 15 puntos.

Ang reserve forward sa Suns nga si T.J. Warren mihimo’g career-high 28 puntos aron pangulohan ang Suns, kinsa napilde na og upat sa miaging lima ka duwa.

Sila si Eric Bledsoe ug Brandon Knight miamot og 21 puntos matag usa alang sa Phoenix.

Didto sa Denver, si Kawhi Leonard miposa og 25 puntos, samtang si Tony Parker  midugang og 13 puntos aron baswaton ang San Antonio Spurs ngadto sa 91-80 nga kadaugan batok sa Denver Nuggets.

Ang Spurs nagduwa nga wala silang Tim Duncan ug Manu Ginobili, kinsa gibilin didto sa Texas aron makapahuway.

Didto sa Sacramento, California, mipabuto og 22 puntos si Andrew Wiggins aron pangulohan ang Minnesota Timberwolves nga mipukan sa Sacramento Kings sa iskor nga 101-91. (BANAT NEWS)