CARSON, California — Gawas ni Donnie 'Ahas' Nietes, impresibo sab ang gipakitang labok sa managsoong 'Prince' Albert ug Jason 'El Nino' Pagara ug ingon man ang sumusulbong nga bitoon sa ALA Stable nga si Mark 'Magnifoco' Magsayo sa ilang US debut nga midugang og kahayag sa malampuson nga labing unang Pinoy Pride event dinhi sa Amerika.
Si Albert Pagara mipatikangkang ni William “Chirizo’ Gonzales sa ikaunom nga hugna aron pagsakmit sa WBO Intercontinental junior featherweight title ug ingon man pag-inat sa way pilde niyang record ngadto sa 25-0 nga gidayan-dayan na karon og 18KOs.
Samtang ang iyang maguwang nga si Jason Pagara, nga maoy kasamtangang WBO International junior welterweight champion, wala sab magpa alkansi gumikan kay gipatikay-ang niini si Santos ‘El Toro’ Benavides sud lamang sa duha ka hugna.
Bangis kaayo si Jason gumikan kay katulo niining gipakamang si Benavides sa ikaduhang hugna hinungdan nga wala na maglangan pa ang reperi pag-undang sa away.
Si Jason Pagara nagbitbit na karon og 37-2 win-loss record uban ang 23KOs, samtang si Benavides nanaog ngadto sa 27-6-2 (19KOs).
Sa iyang bahin, nakakuha sab og atensiyon ang garbo sa mga Boholano nga si Magsayo gumikan kay yano ra man niining gipukan ang Mehikanong si Yardley Suarez sa gubat tali sa pulos way pildeng mga boksidor.
Gipakamang ni Magsayo si Suarez duha ka higayon sa unang hugna dayon na ngadto sa pagdepensa sa iyang IBF Youth featherweight title ug ingon man pag-inat sa nagkadena niyang daog ngadto sa 12-0 nga karon gi-adornohan na og 10 ka knockout.
Sa labing unang away, ang Sugbuanong boksidor nga si Bruno Escalante, lumad gikan sa lungsod sa Sibonga apan anhi na magbase sa Redwood, California, naka-angkon sab og pagdayeg sa mga Pinoy fans human siya miyagyag og maayo sa ilang abilidad aron pagbuntog sa Mehikanong si Nestor Ramos pinaagi sa unanimous decision human sa unom ka hugna nilang binakbakay. (BANAT NEWS)