Chick@Phil Basic nakatilaw na gyud og daog
CEBU, Philippines – Milanat una og pito ka duwa sa wala pa makatilaw og daog ang Chick@Phil Basic human ilang gipakuratan ang Filmon Prince Medallion, 45-41 Division A sa 20th SHAABAA Cup basketball tournament niadtong Domingo didto sa SHS-AdC Canduman campus, Mandaue City.
Si Japeth Quiñanola maoy nangu sa kadaugan sa Chick@Phil Basic sa iyang 15 puntos, samtang si Jonathan Cimafranca mao sab ang nangu sa Filmon Prince Medallion sa iyang 19 puntos.
Ang Chick@Phil ug ang Filmon pareho karong nagbitbit og 6-1 nga baraha. Sa laing duwa, ang Petron Goldberry miposte og 7-0 nga baraha human gipukan ang Cebu Landmasters, 67-58.
Gipangulohan ni Leight Dixin ang Petron nga mibahog og 17 puntos, samtang sila si Dave Ting ug Justin Huang miamot og 12 puntos matag usa.
Ang Cebu Landmasters nga adunay 4-3 nga baraha, gipangulohan ni Daryl Tan sa iyang 16 puntos ug Jessieneth Wahing nga adunay 10 puntos.
Midaog sab ang RDAK Stallions batok sa Bayfront Hotel Cebu, 66-54.
Sila si Jair Igna ug Flacher Galvez maoy nangu sa Stallions sa ilang 12 ug 11 puntos matag usa, samtang ang Bayfront ( 3-4) gipangulohan ni Elmer Cabahug sa iyang 22 puntos, gisundan ni Eld Cabahug nga adunay 10 puntos.
Sa mga sangka sa Division B, ang RDAK Transporters pabiling nag-una karon sa liderato human ilang gipilde ang Caltex Delo, 64-54.
Si John Paul Cabrera maoy nangu sa 7-1 nga Tranporters sa iyang 13 puntos, si Charleston Sia miamot og 12 puntos ug sila si Barlowe Rogado ug Joevince Canizares adunay 10 puntos matag usa.
Si Chad Canares maoy nangu sa 3-4 nga Caltex sa iyang 16 puntos.
Ang Autolab midaog batok sa Filmon Finishing Studio, 66-58 ubos sa pagpangulo nilang Roger Panal ug Serg Gobui nga miburak og 14 ug 10 puntos matag usa.
Upat ka players sa Filmon ang miiskor og double figures sa pagpangulo ni Kenneth Yu pinaagi sa iyang 17 puntos. Si Lester Canizares miamot og 12 puntos, samtang sila si Aldie Canizares ug Mark Sanchez adunay 11 puntos matag usa. (BANAT NEWS)
- Latest
