Pampanga’s Bests

CEBU, Philippines - Ugma, Enero 4, maoy unang duwa sa PBA sa tuig 2015 diin mosuway sa pag-abante sa Philippine Cup finals ang Alaska Aces sa Game-6 sa ilang best-of-seven semifinal series batok sa Rain or Shine Elasto Painters didto sa Mall of Asia Arena.
Masayran sab ugma kun ang Aces ba gyud maoy ikasangka sa nagpaabot  nga San Miguel Beermen sa best-of-seven finals o makatabla ba ang Rain or Shine aron makakuha og laing higayon nga moabante sa finals kun  makapugos sila’g Game-7.
Mas pabor hinuon sa kasamtangan nga posisyon ang Aces tungod kay usa na lang ka daog ang ilang gikinahanglan, samtang ang Painters mag-agi pa og do-or-die match.
Init ang sangka ugmang adlawa ilabi kay dunay mga kasilo ang Rain or Shine ngadto kang PBA Commissioner Atty. Chito Salud sa wala niya pagsuspenso kang Calvin ‘The Beast’ Abueva, kinsa misukmag sa tiyan ni Jonathan Uyloan sa Rain or Shine atol sa Game-4. 
Sa maong duwa, na-ejected si Abueva tungod sa Flagrant 2 foul. Si Abueva wala suspensoha ug igo lang gipamulta’g  P20,000 sa iyang binuhatan.
Lahi sa kaso kang coach Yeng Guiao nga igo lang niyang gisaway ang officiating, mas daku siya’g multa.  Si Guiao gipabayad  og P100,0000 niadtong Pebrero 5 sa miaging tuig tungod sa iyang pagsaway sa mga sakop sa table technical commitee nga iyang gipakitaan og “dirty finger.”
Daan nang naila si Guaio nga init ug emotional coach sukad pa sa panahon nga siya maoy coach sa Swift Mighty Meaty ug sa Red Bull Barako.
Sa iyang bahin, gimultahan na sab kaniadtong Enero 10, 2014 si Abueva human siya ma-ejected tungod sa duha ka technical fouls.  Si Abueva ug Guiao parehong mga Pampangeño.
Samtang naila sa mga lamiang pagkaon ang Pampanga, ilabi na sa ilang caldereta, balbacua ug tocino gawas pa sa ilang ka kugihan ilabi na kadtong gikan sa lungsod sa Macabebe, namugna ang pulong nga Pampanga’s Best. Kining engkwentro sa basketball court tali ni Guaio ug Abueva, dili na kini ang orihinal nga Pampanga's Best kun dili sila na maoy Pampanga’s Beasts. (BANAT NEWS)