CEBU, Philippines - Sa ikatulong higayon, gilangkat sa University of the Visayas (UV) Baby Lancers ang Under 16 Division 1 title sa Alaska Basketball Cup Cebu 2014 (CYBL) human nila gilubong ang Cebu Eastern College (CEC) Dragons sa finals, 73-55 niadtong Biyernes didto sa Magis Eagles arena sa dan General Maxilom Avenue, ning dakbayan.
Si Orlan Wamar mipasiugda sa mainitong rally sa second quarter diin mibahog siya'g 10 puntos. Ang kainit ni Wamar gisawo ni Joshua Flores sa third period diin miposa siya'g 12 puntos aron molabaw og daku ang UV.
Midaku pa gyud ang ilang labaw, 69-50 sa nahabiling 2:56 sa fourth period.
Silang Flores ug Wamar maoy nangu sa UV sa ilang 20 ug 18 puntos matag usa samtang ang Dragons gipangulohan ni Denzel Sabroso, kinsa mibugwak og 21 puntos diin 11 niini gikan sa fourth period.
Ang UV Baby Lancers maoy midaog sa titulo niadtong 2012 ug 2013.
Sa laing bahin, ang CEC-B maoy kampiyon sa Under 13 Division human ila sab nga gilubong ang Colegio dela Immaculada Concepcion-Mandaue (CIC-M), 66-39.
Sa mga duwa sa Under 19 Division, midaog ang SHS-AdC batok sa USPF, 87-72 ug ang CVIRAA midaog sab batok sa SHS-AdC, 88-74. (BANAT NEWS)