CEBU, Philippines - Duha ka walay pildeng koponan San Miguel Beermen ug Talk N’ Text Tropang Texters ang mag-ilog alang sa No. 1 seed sa pagpadayon sa PBA Commissioner's Cup karong adlawa didto sa Smart Araneta Coliseum.
Ang Beermen ug Tropang Texters nga adunay 2-0 win-loss records magbinuk-anay sa ilang baraha sa alas-8 sa gabii, human gyud sa duwa tali sa Barako Bull Energy Cola ug Air21 Express sa alas-5:45 sa hapon.
Gipaabot karon ang pagduwa sa bag-ong import sa San Miguel nga si Kevin Jones, ang mohulip sa gipapauli nga si Josh Boone.
Ang ex-Cleveland Cavaliers cager nga si Jones magpas-an og bug-at nga bagahi tungod kay kinahanglan nga modaog kini sa una niyang duwa human ang Beermen gibinlan ni Boone og duha ka daog.
Gipaabot sab karon ang pagbalik og duwa ni "Best Player of the Conference" Junemar Fajardo, kinsa wala makapakita'g aksiyonsa unang duha ka duwa tungod sa knee injury.
Apan ang coach sa Talk N' Text nga si Norman Black nangandam na sa maong duwa ug gitugyan niya ang iyang pagsalig ngadto ni import Richard Howell nga maoy moatbang ni Jones. (BANAT PALARO)